Kơxo lơ 31/1, a tíu pêi cheăng Tíu xiâm Đảng, pôa Nguyễn Phú Trọng, kăn pơkuâ hnê ngăn Đảng pơkuâ po rôh hôp dêi Khu xiâm pơkuâ hnê ngăn Đảng mơnhên tối tơdroăng pơkâ kơxô̆ 19 dêi Khu xiâm pơkuâ hnê ngăn Đảng ‘na tơkŭm po Têt Quý Mão hơnăm 2023; hnê mơhno mâu hnoăng cheăng ki xiâm dêi Tơnêi têa, mâu khu râ hnê ngăn Đảng tung la ngiâ. Mơgêi rôh hôp, pôa Nguyễn Phú Trọng tối nhên, tơdroăng ki pêi pro pơkâ kơxô̆ 19 ƀă rĕng pơkâ hnê mơhno mâu hnoăng cheăng ki xiâm hiăng kum khu râ hnê ngăn Đảng, khu kăn pơkuâ rêm râ teăm hbrâ rơnáu mâu tơdroăng vâ kuăn pơlê hơniâp ro rơnó Hơngui tơdah Têt hơniâp ro, rak tơniăn, kơdĭng; bro chiâng tơdroăng ki phiu ro, tơrŭm, ‘nâi tŏng kum hơ-ui dêi rơpó, cho tơdroăng ki vâ pêi pro ƀlêi chiâng mâu tơdroăng pơkâ hnoăng cheăng dêi hơnăm nếo 2023.

Tối troh hnoăng cheăng hiăng vâ chê troh la ngiâ, pôa Nguyễn Phú Trọng pơchân, athế pơtối tối tơbleăng, ‘nâi nhên mâu tơdroăng ki mơni kô trâm vâ ai troăng hbrâ ví, pôu tá tơngôu, ôh tá hmâng. Klêi kơ’nâi pơtê Têt, tơkŭm pơkuâ, hnê mơhno, tơkŭm pêi pro kơtăng, tơƀrê mâu tơdroăng pơkâ, mơgêi dêi Tơnêi têa ƀă khu râ, pơkuâ cheăng rêm râ. Rêm kơ koan, tíu pêi cheăng, kong pơlê chêh pro túa pơkâ nhên dêi hơnăm 2023 vâ tơbleăng tro, mơ-eăm pêi pro ƀlêi chiâng mâu tơdroăng pơkâ hnoăng cheăng hơnăm 2023, hơnăm ivá dêi hneăng cheăng Hneăng hôp kân 13 dêi Đảng.