Kơxo lơ 29/11, a tíu pêi cheăng dêi tíu xiâm Đảng, Khu xiâm kal kí, Kăn hnê ngăn Đảng tơkŭm po hneăng hôp tung lâp tơnêi têa têa ‘no tơdrêng tiô troăng hyôh Internet tơkŭm tơdrêng hnê, tơbleăng pêi tơdroăng pơkâ kơxô̆ 30-NQ/TW dêi Khu xiâm kal kí hneăng má 13 ‘na troăng rơhlâ mơnhông cheăng kâ - rêh ối, kring vế tơniăn cheăng lêng, rak tơniăn a kơpong tơbăng kroăng Hồng troh hơnăm 2030, hvái ngăn vâ pêi mâu tơdroăng cheăng troh hơnăm 2045. Pôa Nguyễn Phú Trọng Kăn xiâm pơkuâ hnê ngăn Đảng pơkuâ hôp ƀă ai ƀai tơbleăng hnê mơhno tơdroăng ki kal a rôh hôp.

Kố cho hneăng hôp pêi klêi tơdroăng cheăng pơkâ ƀă tơkŭm hnê tối, tơbleăng pêi mâu Pơkâ dêi khu xiâm kal kí hneăng 13 ƀă tâi tâng 6 kơpong cheăng kâ - rêh ối dêi lâp tơnêi têa. Kơpong tơbăng kroăng Hồng mê cho ai 11 to kong pơlê, pơlê kong kơdrâm, pơlê kong kân dêi Khu xiâm tơnêi têa. Tung tơdroăng chêh ‘măn rơpâu hơnăm mơjiâng tơnêi têa ƀă rak vế tơnêi têa dêi hdroâng mơngế pin, đi đo cho kơpong ki xiâm dêi kơpong pơlê xiâm, ai pơxúa kân má môi dêi lâp tơnêi têa ‘na tơdroăng kal kí, cheăng kâ, túa lĕm tro, ‘na cheăng lêng, kring vế tơniăn ƀă tơpui kâ.

Tơdroăng pơkâ nếo kô veăng kum pơ’lêh rơdêi, tơƀrê tung tơdroăng pơ’lêh nếo, mơnhông cheăng kâ-rêh ối, kring tơniăn cheăng lêng, kring tơniăn kơpong tơbăng kroăng Hồng ƀă tung lâp tơnêi têa tung pơla mâu hơnăm mơnhông mơdêk nếo.