Kơxê lơ 2/2, Đảng ủy Ƀơrô cheăng Tơnêi têa tơkŭm po kân krip Leh diâp Me dái 55 hơnăm ối tung Đảng diâp ăm pôa Nguyễn Phú Trọng, kăn xiâm pơkuâ hnê ngăn Đảng tơnêi têa. Diâp Me dái inâi Đảng, diâp reăng ƀă tơpui rơkâu kơ kăn xiâm pơkuâ hnê ngăn Đảng, pôa Võ Văn Thưởng, kăn cheăng má môi tung Khu pơkuâ hnê ngăn Đảng tối nhên, 55 hơnăm ối tung Đảng, pôa Nguyễn Phú Trọng, kăn xiâm pơkuâ hnê ngăn Đảng hiăng tơkâ luâ hên hnoăng cheăng ki kal xua Đảng, Tơnêi têa ƀă kuăn pơlê pơcháu, ai hên hnoăng cheăng ki pleăng kân kĭn ăm tơdroăng cheăng kăch măng dêi Đảng ƀă hdroâng mơngế pin, malối cho tung tơdroăng ki hơ’lêh nếo, mơjiâng ƀă rak vế Tơnêi têa.

Tơpui a rôh leh, pôa Nguyễn Phú Trọng, kăn xiâm pơkuâ hnê ngăn Đảng ƀriê tung hiâm mơno ƀă tối, kố cho môi tơdroăng ki tơbâ trâu hơngế, hâk phiu  khât ƀă tơná pôa; tung plâ rôh kơdo mơ-eăm, mơdêk ivá hriâm pât, mơ-eăm hriâm tâp ƀă pêi pro tiô troăng tơdjâ, hiâm mơno, túa cheăng, rêh ối Hồ Chí Minh, tơxâng cho ngế đảng viên dêi Đảng.