Pôa Nguyễn Phú Trọng, Kăn xiâm pơkuâ hnê ngăn Đảng koh phiu ro pôa Chăn-xa-mỏn Chăn-nha-lạt pơkuâ djâ Khu râ kăn teăng mâ cheăng lêng khu râ kăn xiâm kong têa Lếo lăm pôu pêi cheăng a Việt Nam; kheăn kơdeăn khôi túa lĕm tro, tơdroăng châ tơƀrê tơrŭm cheăng lêng péa tơnêi têa hdrối nah xuân môi tiah nôkố, tơdroăng châ tơƀrê roh tơpui tơno pơla péa Ngế xiâm pơkuâ lêng.

Kăn xiâm pơkuâ hnê ngăn Đảng pơkâ thế Khu xiâm pơkuâ lêng péa tơnêi têa pơtối mơnhông mơdêk khôi túa lĕm tro dêi tơná, pêi pro ƀlêi trâng mâu hnoăng cheăng kal kí châ pơcháu, tơrŭm krá tơniăn pêi pro châ tơƀrê Pơkâ kơthô ƀă Tơdroăng pêi, pơkâ pêi tơrŭm cheăng pơla Khu xiâm pơkuâ lêng, pơtối pơtâng trâu rơdâ ki kơnâ tơdroăng mơnhông mơdêk, ki kal dêi tơrŭm cheăng Việt Nam - Lếo tung tâi tâng kuăn pơlê.

Kăn xiâm pơkuâ hnê ngăn Đảng mơnê Lếo hiăng ăm Việt Nam tơdroăng môi tuăn ƀă tŏng kum kân kĭn sap ing hdrối nah troh nôkố, tung mê, ai tơdroăng rŭm môi tuăn, tŏng kum dêi khu lêng kong têa Lếo; mơnhên ki kơnâ dêi tơrŭm cheăng ki má môi dêi Việt Nam - Lếo  ôh tá xê cho péa tơnêi têa achê, mê ối cho khu pú, nhŏng o ki achê, rơtế hmâ pá puât tung tơdroăng tơplâ tơleăng lĕm hdroâng mơngế môi tuăn tơnêi têa xuân môi tiah tung tơdroăng mơjiâng ƀă gâk kring tơnêi têa nôkố.