Tối tơbleăng a hneăng Hôp, pôa Nguyễn Phú Trọng, Kăn xiâm pơkuâ hnê ngăn Đảng tối, ƀă plâi nuih hâk vâ, ƀă tơdroăng ‘nâi hriăn plĕng, vâ hriâm ƀă púi vâ hriâm khât, mâu rơtăm hơnăm ối nếo đi đo cho mâu ngế ki djâ troăng a hdrối pêi mâu hnoăng cheăng kăch măng.

Pôa Nguyễn Phú Trọng pơkâ thế, mâu râ xiâm Đoân Droh rơtăm pơ’lêh nếo ƀă mơdêk tâ nếo ki tơƀrê, pơxúa tơƀrê mâu tơdroăng cheăng pêi, túa pêi cheăng dêi Đôan Droh rơtăm Kŏng sản Hồ Chí Minh ƀă mâu khu tơrŭm cheăng, mâu phô̆m xông kân Việt Nam, ngăn mê cho xiâm vâ mơdêk tơƀrê tơdroăng cheăng dêi Đoân, ai tiô púi vâ tiô tơdroăng nếo nôkố, veăng ‘no hnoăng mơjiâng Đảng ƀă khu cheăng kal kí, mơdêk khu tơrŭm môi tuăn mơjiâng tâi tâng kuăn pơlê ƀă kring vế luât xah hô̆i chuh ngiah.