Hâi lơ 17/2, pôa Nguyễn Phú Trọng, Kăn xiâm pơkuâ hnê ngăn Đảng hiăng tơdah khu kăn dêi Bơrô xiâm Đảng kong têa Lếo xua pôa Thongsalith Mangnomek, Kăn xiâm Ƀơrô djâ troăng lăm pôu, pêi cheăng a Việt Nam. Pôa Nguyễn Phú Trọng hiăng phiu ro, sôk suâ ‘na mâu tơrŭm cheăng ki trâu rơdâ, tơrŭm tâi tâng mâu kơvâ cheăng pơla Việt Nam ƀă Lếo rế hiá thăm rế mơnhông, rế trâu rơdâ, ai pơxúa, châ tơƀrê tung rêm kơvâ cheăng, veăng kum kal khât ăm kring vế rak ngăn hnoăng pơkuâ ngăn tơnêi têa, tơniăn ăm tơdroăng kring vế, gak ngăn ƀă mơnhông pêi cheăng kâ - rêh ối pơlê pơla dêi rêm pâ tơnêi têa.

Tung la ngiâ ah, péa pâ Đảng, péa pâ tơnêi têa kal pơtối thăm mơdêk ƀă mơnhông châ tơƀrê hên tâ nếo vâ tơxâng chiâng pêi pro mâu hnoăng cheăng ki nếo, rơtế tơno tối, mơhno djâ dêi pó, tŏng veăng dêi pó, tơkâ luâ mâu tơdroăng xapá.

Pôa Nguyễn Phú Trọng pâ thế péa Bơrô xiâm Đảng tơnêi têa pơtối mơnhông hnoăng cheăng dêi tơná, tơrŭm krá khâp, hnê mơhno dêi pó mâu túa tơpui leăng ƀă hnoăng cheăng xiâm, ki rơkê plĕng, tơrŭm rơtế tơveăng dêi pó tung pêi pro mâu hnoăng cheăng la ngiâ, pêi pro châ tơƀrê tơdroăng Kĭ tơkêa pơla Ƀơrô xiâm Đảng bă tơhrâ ki kân pơla khu kăn xiâm Đảng, veăng kum pơkâ mơ’no mâu tơdroăng cheăng ăm i ƀlêi chiâng Hnoăng cheăng ki pơkâ dêi Hneăng hôp kân rêm Đảng dêi péa tơnêi têa.