Kơxê lơ 9/2, a tíu pêi cheăng xiâm Đảng, pôa Nguyễn Phú Trọng, Kăn xiâm pơkuâ hnê ngăn Đảng hiăng ai rôh tơpui phôn ƀă pôa Kishida Fumio, Kăn xiâm hnê ngăn Dảng Dân chủ Tự do, Ngế pro xiâm hnê ngăn kong têa Nhuk. A rôh tơpui phôn, Péa ngế kăn xiâm pơkuâ tối nhên kố cho tơdroăng ki apoăng koh tơbâ 50 hơnăm mơjiâng tơrŭm cheăng tơpui kâ Việt Nam – Nhuk.

Tiah mê, péa ngế kăn xiâm pơkuâ rơtế môi tuăn ‘na tơdroăng môi tuăn tŏng kum péa pâ tơrŭm tơkŭm po tro mâu tơdroăng tơbâ vâ ăm tơrŭm cheăng péa tơnêi têa mơnhông tâk troh a ivá ki nếo, pro pơxúa kal khât ăm kuăn pơlê péa tơnêi têa. Pôa Nguyễn Phú Trọng, Kăn xiâm pơkuâ hnê ngăn Đảng tối nhên, Việt Nam mơ-eăm tiô troăng tơpui kâ tơniăn krê, hơniâp lĕm, tơrŭm tơroâ, tơrŭm ƀă mơnhông, pro hơ’lêh hên tơrŭm cheăng tơpui kâ; hbrâ rơnáu ƀă kơhnâ mot tơrŭm ƀă kong têa ê tung tâi tâng, trâu hơngế; Việt Nam cho kong têa ki loi tơngah ƀă cho kong têa ki kơhnâ, pôu râng dêi hnoăng cheăng tung mâu kong têa lâp plâi tơnêi. Tung mê, Nhuk cho tơnêi têa tơrŭm cheăng ki kal xiâm dêi Việt Nam.