A rôh hôp, pôa Nguyễn Phú Trọng, Kăn xiâm pơkuâ ngăn Đảng, pôa Nguyễn Xuân Phúc, Kăn xiâm hnê ngăn tơnêi têa, pôa Phạm Minh Chính, Ngế pro xiâm hnê ngăn Chin phuh tơmâng xo, mơnhên tối khât ivá mơ-eăm, hiâm mơno djâ troăng ahdrối ƀă mâu tơdroăng ki hiăng pêi pro klêi dêi Đảng ủy Kŏng an Tơnêi têa, Khu xiâm ngăn Kŏng an tung hơnăm 2023; tối nhên, khu lêng Kŏng an Nhân yân hiăng pêi rơkê hnoăng cheăng châ pơcháu.

‘Na hnoăng cheăng tung la ngiâ, pôa Nguyễn Phú Trọng pơkâ thế, Đảng ủy Kŏng an Tơnêi têa pơtối mơdêk hnoăng cheăng djâ troăng ahdrối, ngăn nhuô̆m hnoăng cheăng mơjiâng Đảng, mơjiâng khu lêng Kŏng an Nhân yân, ngăn kố cho hnoăng cheăng ki kal, ki xiâm dêi hơnăm 2023 ƀă mâu hơnăm ki pơtối; mơdêk hnoăng cheăng xiâm tung pơkuâ hnê mơhno hnoăng cheăng rak vế gak kring, tơniăn, veăng kum tơbleăng tơƀrê mâu tơdroăng pơkâ Tơnêi têa ‘na mơnhông cheăng kâ rêh ối pơlê pơla ƀă rak vế tơniăn gâk kring pơlê pơla cheăm bêng, gâk kring troh hơnăm 2030, hnoăng pêi troh hơnăm 2045 dêi 6 kơpong tung lâp tơnêi têa; pơtối pêi pro hên hnoăng ƀlêi chiâng nếo ƀă pêi klêi rơkê hnoăng cheăng châ pơcháu, ki hdrối tâ cho hơnăm 2023 ƀă tá hneăng 2020 – 2025.