A rôh pêi cheăng, Kăn xiâm ngăn pơkeăng pơlât tối, mâu tơdroăng ăm hlo châ tơƀrê tung tơdroăng tơrŭm cheăng ƀă Khu hnê mơhnhôk cheăng tíu xiâm pơla hơnăm 2021-2025. Ing mê, péa pâ hiăng tơrŭm ƀă teăm tối ăm ‘nâi mâu tơdroăng, ‘na tơdroăng cheăng kal kí, malối tung hbrâ mơdât pơreăng COVID-19. Hnê kuăn pơlê thế rak ngăn krâu dêi ivá, kring vế, mơdêk ivá mo lĕm ƀă hên ki ê.

Teăng mâ Kăn xiâm hnê ngăn Đảng, Tơnêi  têa, pôa Nguyễn Trọng Nghiã, Ngế xiâm hnê mơhnhôk cheăng kal kí tíu xiâm tơmâng xo mâu tơdroăng ki mơ-eăm, pleăng hnoăng kân kĭn dêi kơvâ Ngăn pơkeăng pơlât ƀă khu pú hên dêi mâu ƀok thái pơkeăng, mâu ngăn pơkeăng tung mâu hơnăm hdrối mê hía nah. Hlối pơtroh ăm tâi tâng mâu ngế ngăn pơkeăng rơkong rơkâu ki lĕm má môi drêng troh leh tơbâ 68 hơnăm Hâi ƀok thái pơkeăng Việt Nam.

Ngế xiâm hnê mơhnhôk cheăng xiâm tơnêi têa tối nhên, kơvâ ngăn pơkeăng tung la ngiâ kô pơtối trâm hên tơdroăng pá, pơloăng mơnúa; pơkâ thế, rêm râ Đảng, mâu kăn pơtối tơmâng khât ƀă kơvâ ngăn pơkeăng ƀă khăm pơlât ivá kuăn pơlê. ‘Măn ăm tơdroăng ki tơxâng vâ mơdêk hngêi pơkeăng, tíu khăm pơlât ivá kuăn pơlê tơniăn lĕm, xúa pêi cheăng ton hơnăm.