Tơdah ƀă pêi cheăng ƀă kăn xiâm hnê ngăn tơnêi têa pin ƀă Khu kăn ai kăn pơkuâ kong pơlê Gyeonggi cho pôa Kim Dong-yeon ƀă mâu kăn tơpui kâ dêi kong pơlê ƀă pơlê kong kân Gwangju. mê Gyeonggi cho kong pơlê kơdrâm má môi kong têa Hàn Quốc ‘na pơ’leăng mâ mơngế, ối má 5 ‘na tơnêi kân rơdâ. Kong pơlê ai 28 pơlê kong kơdrâm ƀă 3 tơring; tíu xiâm cho pơlê kong kân Suwon. Ki tơviah, kố xuân cho pơlê xiâm má péa dêi dâng vâ chê 37 rơpâu ngế Việt Nam rêh ối; tung mê ai dâng 3 rơpâu ngế Việt Nam ƀă lối 500 rơpŏng Việt Nam – Hàn Quốc dế rêh ối a pơlê kong kân Gwangju.

A rôh pêi cheăng, pôa Nguyễn Xuân Phúc pâ thế kăn pơkuâ kong pơlê Gyeonggi, pơlê kong kơdrâm Gwangju ƀă khu kăn pơkuâ kong pơlê thăm mơhnhôk mâu khu mơdró kâ dêi kong pơlê po rơdâ túa pơkâ ƀă pêi pro hơ’lêh tơdroăng ‘no liăn pêi cheăng, tê mơdró a mâu kong pơlê dêi Việt Nam, tŏng kum tối tơbleăng ki rơkê plĕng ăm mâu kong pơlê Việt Nam tung hnoăng cheăng rak ngăn hlá mơ-éa, túa pơkâ mơnhông ôm hyô, séa ngăn tơdah xo hên ngế pêi cheăng dêi Việt Nam; pơtối mơdoh hên tơdroăng tŏng kum tơmâng ngăn ‘na troăng hơlâ tŏng kum ăm kuăn pơlê Việt Nam a kong pơlê kố.

Kơmăng hâi ki mê, pôa Nguyễn Xuân Phúc ƀă khu kăn xiâm Việt Nam hiăng lo ing kong pơlê Gyeonggi, troh a tơraih tơƀai lêng Pơlê kong xiâm Seoul, vêh ngi tơnêi têa, mơgêi tâi tâng rôh lăm pôu râ kong têa Hàn Quốc.