Tung rôh lăm pôu râ kăn xiâm tơnêi têa troh a Hàn Quốc, kơxê lơ 4/12, klêi troh a pơlê kong xiâm Seoul, pôa Nguyễn Xuân Phúc, Kăn xiâm hnê ngăn tơnêi têa hiăng ai rôh trâm mâu khu tơrŭm cheăng, tơrŭm ‘na cheăng kâ, mơhno túa lĕm tro, trâm tơpui tơno ƀă kuăn pơlê Hàn Quốc - Việt Nam ki ai hên hnoăng veăng 'no tung mơnhông tơrŭm cheăng pơla péa tơnêi têa. Tơdah hôp tơpui tơno pơla Hàn Quốc - Việt Nam (KOVIFA), xua pôa Kim Joon, Kăn xiâm hnê ngăn khu pơkuâ djâ, pôa Nguyễn Xuân Phúc, Kăn xiâm hnê ngăn tơnêi têa tối nhên, tung pơla 30 hơnăm hdrối mơhé ôh tá ton la tơrŭm cheăng péa tơnêi têa hiăng châ pêi hên tơdroăng, cho kong têa tơrŭm ki kal má môi dêi rơpó, cho túa ki tơrŭm tung tơrŭm lâp plâi tơnêi, tơrŭm tung mâu kơvâ cheăng, ‘no liăn cheăng, tê mơdró, ôm hyô, pêi cheăng.

Kăn xiâm hnê ngăn tơnêi têa púi vâ ƀă loi khât kơ khu kô pơtối djâ troăng a hdrối, pơtối rak hnoăng cheăng ki xiâm ‘na tơpui kâ ƀă kuăn pơlê; mơdêk tơrŭm cheăng tung hên tơdroăng; mơhnhôk mâu khu mơdró Hàn Quốc mơdêk ‘no liăn cheăng, tê mơdró ƀă Việt Nam; tơrŭm tŏng kum 20 rơpâu ngế Việt Nam a Hàn Quốc, malối cho rơpŏng hngêi mâu ngế mế dêi Việt Nam ki xo dôh Hàn Quốc.