Kơxo lơ 18/12, pôa Nguyễn Xuân Phúc, Kăn xiâm hnê ngăn tơnêi têa veăng leh ƀă pêi pro tơdroăng tơkŭm po phiu ro mơjiâng pro kêi đeăng kơpong tơbâ Hòn Tàu – Đèo Le, a cheăm Quế Long, tơring Quế Sơn, kong pơlê Quảng Nam. Xông tơpui a roh leh, pôa Nguyễn Xuân Phúc koh tơbâ ƀă mơhno hiâm mơno mơnê ôh tá kâi tối troh Pôa Hồ Chí Minh, Kăn xiâm hnê ngăn tơnêi têa hneăng apoăng kơnía kân, mơhno hiâm mơno pâ mơnê trâu hơngế ƀă pâ vế hnoăng kân kĭn dêi mâu kăn xiâm pơkuâ, kăn ƀô̆ mâu lêng, mô đô̆i ƀă khu lêng hiăng khên tơnôu hlâ xua tơdroăng tơplâ xâ tơleăng lĕm hdroâng mơngế.

Pôa Nguyễn Xuân Phúc tối nhên, tơdroăng phiu ro hiăng mơjiâng pro kêi đeăng Kơpong tơbâ Hòn Tàu – Đèo Le ki kơnâ kân drêng nôkố, mô đô̆i ƀă kuăn pơlê dêi tơnêi têa dế tơmiât troh leh tơbâ 78 hơnăm Hâi mơjiâng Mô đô̆i Việt Nam (22/12) ƀă 33 hơnăm Hâi tâi tâng kuăn pơlê gâk kring (22/12). Ing mê, môi xôh nếo mơnhên roh tơplâ gâk kring Tơnêi têa dêi hdroâng mơngế Việt Nam cho roh tơplâ ki ki tro, xua tơniăn krê, tơniăn lĕm ƀă hơniâp lĕm dêi kuăn pơlê.