A rôh pêi cheăng, pôa Phạm Minh Chính - Ngế hiăng hmâng Ngế xiâm ngăn ‘na pêi chiâk ƀă Hyôh kong prâi; Kăn hnê ngăn pơlê kong kơdrâm Huế ƀă mâu kong pơlê: Quảng Trị, Hà Tĩnh, Nghệ An, Thanh Hóa… tối tơbleăng tơdroăng cheăng hbrâ ví xía vâ khía má 5 plong mot.  Ƀă tuăn  mơ-eăm vâ “hbrâ mơdât tâ kơ tơplâ ƀă ki pá” Ngế pro xiâm hnê ngăn tơnêi têa pơkâ thế hbrâ a kơlo ki hên má môi.

Ngế pro xiâm hnê ngăn tơnêi têa tối nhên, tơdroăng hbrâ ví xía vâ khía kân má 5 plong mot thế tơniăn ‘na châ chăn kuăn pơlê mê ki hdrối. Ngế pro xiâm hnê ngăn tơnêi têa pơkâ thế, kơvâ cheăng ƀă cheăm bêng kong pơlê hbrâ sap ing hâi kố, ƀă tơdroăng hbrâ rơnáu khât; pakĭng mê, séa ngăn nhên, hbrâ rơnáu mâu troăng hơlâ vâ hbrâ ví.

Khu hnê mơhno dêi tơnêi têa ‘na hbrâ hdrối kuăn mơngế vâ pêi cheăng hiăng mơjiâng Tíu pơkuâ djâ a Khu xiâm pơkuâ ngăn lêng Kuân khu 4, pro xiâm ki pơkuâ, tơrŭm krá ƀă Khu xiâm ngăn ‘na chiâk deăng ƀă mơnhông thôn pơlê, Khu xiâm ngăn tơmeăm khoăng ƀă Hyôh kong prâi ƀă mâu ngế ki tơdjâk troh.