Kố cho rôh lăm pôu ki apoăng dêi Ngế pro xiâm hnê ngăn Chin phuh Việt Nam troh Ấn Độ ing rôh ki péa tơnêi têa mơjiâng tơrŭm cheăng Kong têa tơrŭm tung la ngiâ Tŭm têk hơnăm 2016. Bu tung péa hâi, Ngế pro xiâm hnê ngăn Chin phuh hiăng ai hên pêi cheăng, ƀă dâng 25 tơdroăng cheăng, tung mê ai mâu rôh tơpui tơno, trâm mâ ƀă kăn xiâm pơkuâ kong têa Ấn Độ, mâu grup pơkuâ ki kân dêi Ấn Độ, tơpui a Rôh hôp Khu mơdró kâ Việt Nam - Ấn Độ ƀă Hô̆i đong mâu tơdroăng kong têa dêi Ấn Độ.
 

Tung rôh lăm pôu, Kăn pơkuâ péa tơnêi têa hiăng tối rơdêi Việt Nam - Ấn Độ tung mâu kơvâ um tơvi môi tiah cheăng lêng – gâk kring, tê mơdró – ‘no liăn cheăng, túa lĕm tro – hnê hriâm ƀă po rơdâ mâu kơvâ cheăng tơrŭm ki nếo ‘na cheăng kâ ngiât, cheăng kâ kơxô̆, cheăng kâ tuăn ngoâ rơkê, thăm mơdêk tê mơdró ƀă ‘no liăn pơla péa pâ, mơdêk rơdêi ƀă bro trâu hngế tơrŭm cheăng ‘na khoahok – kong ngê̆.