Tơbleăng a rôh hôp, Ngế pro xiâm hnê ngăn tơnêi têa ăm ‘nâi, tung la ngiâ ối trâm hên tơdroăng xơpá, pơloăng mơnúa, ối ai hên tơdroăng ki pá liăn ôh tá kơnâ tơmeăm to yă, xua mê thế ‘nâi nhên tơdroăng ki pơhlêh tung tơnêi têa ƀă tung lâp plâi tơnêi vâ tăng troăng rơhlâ rôh ki tơ’lêi hlâu vâ pơtối rak ki rơdêi, rôh tơ’lêi dêi tơnêi têa vâ pơkâ luât teăm tơdrêng, tơƀrê.

Thế hlối pêi hlối vêh ngăn rơnêu hriâm chôa po rơdâ, ôh tá pơkuâ pêi pro kơdrâ. Thế tơrŭm ƀă luât pơkâ ‘na liăn ngân, tê mơdró, ‘no liăn cheăng mơjiâng tơmeăm khoăng, mơnhông tơbrê tơniăn cheăng kâ kân, séa ngăn liăn ôh tá kơnâ la tơmeăm to yă kơnâ. Tơdrêng amê, Ngế pro xiâm hnê ngăn tơnêi têa pơkâ thế, Hngêi rak liăn thế djâ troăng ahdrối tung pơ’lêh kơxô̆ vâ kơdroh kơxô̆ liăn hrê ăm kuăn pơlê khu mơdró.

Ngế pro xiâm hnê ngăn tơnêi têa loi khât tiah kố hngêi rak liăn hiăng pêi tro mê thế pro tro tâ nếo, pơtối nhông tơƀrê tâ nếo mâu tơdroăng ki hiăng pêi pro, tơkâ luâ xơpá pơloăng mơnúa vâ pêi tro tâ nếo tung la ngiâ.