Kơxê lơ 1/12, pôa Phạm Minh Chính, Ngế pro xiâm hnê ngăn Chin phuh pơkuâ po Rôh hôp ‘na mơdât tơdroăng ki tơnăng ká xi xŏng ôh tá tro luât. Rôh hôp kố châ tơkŭm po ‘no tơdrêng tung um tơvi, rơ’jíu a Tíu pêi cheăng Chin phuh ƀă ‘no tơdrêng ing troăng hyôh Internet troh lối 600 tíu mơ’no a mâu cheăm, bêng, pơlê kân, tơring, pơlê kong krâm, pơlê kong kơdrâm ối tung Tơnêi têa.

A rôh hôp kố, Ngế pro xiâm hnê ngăn tơnêi têa pơkâ thế mâu tíu mơ’no pêi pro nhên tơdrăng ki tiah lâi xuân ối ai tơdroăng ki tơnăng ká xi xŏng ôh tá tro luât, ôh tá tối tơbleăng, ôh tá tiô pơkâ. Ngế pro xiâm hnê ngăn tơnêi têa tối nhên, pin pêi tơdroăng kố cho vâ pơxúa ăm tơnêi têa dêi tơná, xua tơdroăng ki pơxúa dêi kuăn pơlê, ƀă xua ‘na um méa dêi tơnêi têa.

Tơpui a rôh hôp, pôa Phạm Minh Chính tối nhên, rôh hôp kố cho vâ tơpui ‘na tơdroăng ki ối ai tung plâ 5 hơnăm kố. Hơnăm nah, Ngế pro xiâm hnê ngăn Chin phuh hiăng hôp ‘no tơdrêng ing troăng hyôh Internet ‘na tơdroăng kố, la tá troh nôkố xuân tá hâi pơkâ tơleăng klêi tơdroăng kố. Ngế pro xiâm hnê ngăn tơnêi têa kal athế tăng hlo xiâm kối, pơkâ tơleăng troh tui lui, hlê plĕng nhên, tơƀrê; tối nhên, tiah lâi mâu kong têa tâ tá pin vâi chiâng pêi pro.