A rôh hôp mâu ngế cheăng tung Chin phuh hiăng tơmâng hlá mơ-éa tối tơbleăng ‘na kơxop hlá mơéa Luât ‘no liăn cheăng tơdjuôm ki ‘mâi hơ’lêh; Pơchuât tơbleăng ‘na kơxop hlá mơ-éa Luât Tơbriât tê tơmeăm; hlá mơ-éa tơbleăng ‘na tơdroăng tơkêa Luât ‘mâi hơ’lêh, ‘no tơ’nôm mâu tơdroăng Luât Liăn ngân tơnêi têa; Luât Pơkuâ ngăn, xúa kế tơmeăm khoăng tơdjuôm, Luât ‘Măn kơdĭng tơnêi têa ƀă hên ki ê.

Malối cho ‘na tơdroăng tơkêa Luât ‘No liăn pêi cheăng tơdjuôm ‘mâi hơ’lêh tiô pôa Phạm Minh Chính - Ngế pro xiâm hnê ngăn tơnêi têa, tung tơdroăng ki ai khât athế cho ing tơdroăng ki ai khât, nhuô̆m tơdroăng ki khât, xo tơdroăng ki khât bro kơxái vê vâ ví mâu tơdroăng pro ôh tá tro, ví tơdroăng ki bro ăm tơdroăng chiâng xôi ăm mâu kăn ƀô̆, rơtế a mê cho tơdroăng ki pôu râng, xâu xôi ƀă ôh tá pêi, ing mê, pro mơhrê liăn ngân, thăm mơdêk ‘no hrê liăn pêi pro kơtăng ăm kuăn pơlê bă khu mơdró kâ.

Ngế pro xiâm hnê ngăn tơnêi têa pơchân, pôi tá pro ai tơdroăng troăng hơlâ pâ ăm, athế rơkê xúa mâu kơxô̆ liăn tung ƀă a kong têa ê, kơxô̆ liăn tơnêi têa bă kong pơlê, thăm mơdêk séa ngăn, tơdroăng ki pro pơxúa ăm tơná liăn ngân vâ kâ kơluâ, pro ôh tá tro, khĕn kơdeăn ƀă pơxâu phâk kơtăng teăm tơdrêng.