Tung tơdroăng séa mơnhên ngăn mâu tơdroăng tơkêa bro, tơmeăm ki kal xiâm tơnêi têa mâu hâi apoăng hơnăm nếo, kơxê lơ 29/1, cho hâi má 8 khế môi âm lĭt, pôa Phạm Minh Chính, Ngế pro xiâm hnê ngăn Chin phuh hiăng séa ngăn tơdroăng tơkêa bro mơjiâng troăng pakĭng 3 Pơlê kong kân Hồ Chí Minh. Tơdroăng tơkêa bro troăng kân pakĭng 3 Pơlê kong kân Hồ Chí Minh xŏn lối 76 km, tơkâ hluâ Pơlê kong kân Hồ Chí Minh, Bình Dương, Đồng Nai, Long An, ƀă pro 04 hlâ troăng kân ăm phêp rơxế kơtâu têi, kân rơdâ cho 19,75 met. Tơdroăng tơkêa bro ai tâi tâng kơlo liăn mơ’no dâng 75.378 rơtal liăn ƀă kơxô̆ liăn ngân Tơnêi têa ƀă kong pơlê. Hâi khế pêi pro tơdroăng tơkêa pro sap ing hơnăm 2023, pêi kêi đeăng ăm xúa sap ing hơnăm 2026.

A mâu tíu troh séa ngăn, Ngế pro xiâm hnê ngăn tơnêi têa pơkâ thế 4 kong pơlê, pơlê kong kơdrâm, pơtối tơrŭm krá tơniăn, pêi tơtro tơdroăng hbrâ mơ’no liăn cheăng, ki má lối cho tơdroăng mơjiâng pro thế ví tơdroăng ‘mâi rơnêu kơ’nâi; pơtối pêi tơtro lĕm tro tâ nếo tơdroăng tăng tơnêi, mơ-eăm pơxiâm mơjiâng pro troăng kân a khế 6/2023 vâ ăm rơxế kơtâu tơniăn a khế 6/2025, pêi kêi đeăng troăng kân tung hơnăm 2026.