Tung chôu phut phiu ro tơrŭm tơrôa, loi nhoăm dêi rơpó tơpui ro, pôa Phạm Minh Chính, Ngế pro xiâm hnê ngăn Chin phuh hâk mơnê kơ pôa Thẩm Hiểu Minh rôh apoăng lăm pôu Việt Nam drêng to pro kăn hnê ngăn Đảng kong pơlê Hải Nam.

Pôa Phạm Minh Chính tối ki kal dêi tơdroăng tơrŭm cheăng tung tŭm tơdroăng pơla Việt Nam - Sinuâ ƀă pơkâ thế péa pâ tơbleăng mơdêk tơrŭm cheăng tung mâu tơdroăng, malối cho mơnhông tê mơdró tiô troăng rơhlâ tơdâng, po rơdâ tơrŭm ‘no liăn cheăng, mơdêk trâm tơpui tơno ƀă kuăn pơlê, ‘mâi mơnhông ôm hyô... ‘na tơrŭm cheăng dêi kong pơlê.

Ngế pro xiâm hnê ngăn pơkâ thế kong pơlê Hải Nam mơdêk tơpui tơno, tơrŭm cheăng ƀă mâu Khu xiâm, kơvâ cheăng, kong pơlê dêi Việt Nam, tung mê ai Pơlê kong kân Hồ Chí Minh ƀă kong pơlê Quảng Ninh; mơdêk tơrŭm rơtế ai pơxúa ‘na ôm hyô, tơdjêp ‘na troăng prôk, hnê hriâm, ‘na pơkeăng pơlât, trâm tơpui tơno mơhno ki lĕm tro; tơrŭm cheăng hbrâ ví hyôh kong prâi hơ‘lêh, tăng troăng tŏng kum mâu xía vâ a têa kơxĭ, tơpui lĕm ƀă dêi rơpó ƀă kuăn pơlê tơná, veăng pơtối rak hơniâp lĕm, tơniăn ƀă tơrŭm a têa kơxĭ.