Kơxê măng lơ 29/11, a tíu pêi cheăng Chin phuh, pôa Phạm Minh Chính, Ngế pro xiâm hnê ngăn tơnêi têa tơdah khu Ƀok Phop Việt Nam. A roh tơdah, pôa Phạm Minh Chính, Ngế pro xiâm hnê ngăn tơnêi têa teăng mâ khu râ kăn pơkuâ Đảng, Tơnêi têa pơtroh rơkong rơkâu troh Khu Ƀok Phop Việt Nam hiăng tơkŭm po châ tơƀrê Hneăng hôp kăn teăng mâ khu Ƀok Phop lâp tơnêi têa roh má IX, hneăng hơnăm 2022 – 2027.

Ngế pro xiâm hnê ngăn tơnêi têa mơnhên, Kuăn khôp Phop ai hên tơdroăng veăng kum kal khât tung tơdroăng ‘’Tŏng kum tơnêi têa, rak tơniăn kuăn pơlê’’; hên ngế kum tơnêi têa, ngế khên tơnôu hdroâng mơngế tung tơplâ xâ nah cho tiô khôp Phop.

Tung mâu hơnăm hiăng hluâ, ƀă troăng pêi  “Troăng luât phop – Hdroâng mơngế - Chuh ngiah pơlê pơla’’, pơtối troăng prôk dêi Khôp phop Việt Nam, kuăn khôp Phop Việt Nam hiăng tơkâ hluâ pá puât, đi đo mơnhông mơdêk, xông kân rơdêi tŭm túa, Khu pơkuâ Ƀok Phop hiăng djâ troăng ahdrối tung tơ’noăng pâ nhuô̆m tơnêi têa, rŭm môi tuăn tâi tâng tơdroăng tiô khôp, mơnhên tơrŭm pơla troăng luât Phop ƀă hdroâng mơngế, tâi hiâm mơno mơ-eăm xua tơdroăng rêh ối lĕm, phâi hơtô, hơniâp lĕm dêi kuăn pơlê.