Kơxo hâi lơ 22/3 a Hà Nội, Ngế pro xiâm hnê ngăn Chin phuh kô ai rôh tơpui tơno tơdrêng ƀă droh rơtăm tung tâi tâng 63 to kong pơlê, pơlê kong kân ƀă inâi “Mơjiâng mâu ngế cheăng hơnăm ối nếo rơkê plĕng pêi pro châ tơdroăng ki rơhêng vâ tung chal 4.0”. A rôh hôp tơpui tơno, Ngế pro xiâm hnê ngăn Chin phuh kô tơmâng mâu tơdroăng ki pâ thế, pơkâ mơ’no, tơdroăng ki rơhêng vâ dêi droh rơtăm tung lâp tơnêi têa, ing mê teăm hnê mơhno tŏng kum, pơkâ tơleăng mâu tơdroăng ki xơpá, tơvâ tơvân tơdjâk troh hnoăng pơxúa tơtro dêi droh rơtăm tung pơla mơjiâng, tơbleăng pêi pro troăng hơlâ, luât dêi Tơnêi têa ƀă droh rơtăm tung hneăng hơnăm nôkố.

Tơdrêng a mê hlối tối tơbleăng troh lâp lu droh rơtăm mâu troăng hơlâ pơkâ dêi Đảng, troăng hơlâ, luât dêi Tơnêi têa vâ pêi pro tơdroăng pơkâ mơnhông droh rơtăm. Malối cho troăng hơlâ dêi Tơnêi têa tung mơjiâng ƀă mơnhông mâu ngế cheăng hơnăm ối nếo rơkê; Hnoăng cheăng, tơdroăng cheăng pôu dêi droh rơtăm tung hriâm tâp, pêi cheăng, veăng tơrŭm mơnhông cheăng kâ rêh ối, pêi pro châ rôh tơ’lêi hlâu ƀă tơdroăng pơloăng mơnúa tung chal 4.0.