Tiô rơkong krếo thế dêi pôa Alexander De Croo, Ngế pro xiâm hnê ngăn kong têa Ƀih, pôa Phạm Minh Chính, Ngế pro xiâm hnê ngăn tơnêi têa pin  lăm pôu pêi cheăng ƀă kong têa Ƀih sap hâi lơ 13 – 15/12 la ngiâ. Kơxê lơ 13/12, klêi kơ’nâi leh tơdah kân krip a tíu pơtáu rêh ối Egmont, péa Ngế pro xiâm hnê ngăn tơnêi têa hiăng tơkŭm po tơpui tơno. A hneăng hôp tơpui tơno, Péa ngế kăn xiâm pơkuâ hiăng môi tuăn mâu troăng prôk, troăng pêi kân vâ  thăm pêi pro rơdêi tâi tâng tơrŭm cheăng pơla péa tơnêi têa, ki má lối cho pro trâu hơngế tung tơrŭm cheăng khu tơrŭm cheăng ton xŏn ‘na pêi chiâk deăng, thăm tơrŭm mơ’no liăn cheăng, tê mơdró ƀă tung mâu kơvâ ki ai tơmeăm hlâu ki ê.

Péa pâ môi tuăn po rơdâ tơrŭm cheăng pơla péa tơnêi têa tung mâu kơvâ cheăng lêng – gâk kring, hnê hriâm – hnê mơjiâng, khôi túa lĕm tro, ki má lối cho tơkŭm po Hâi mơhno khôi túa lĕm tro a rêm tơnêi têa vâ thăm mơdêk hlê plĕng, trâm mâ tơpui tơno pơla kuăn pơlê, ôm hyô ƀă thăm pêi pro rơdêi tơrŭm cheăng rơtế tơleăng mâu pơloăng mơnúa lâp plâi tơnêi. Pôa Phạm Minh Chính, Ngế pro xiâm hnê ngăn tơnêi têa pơkâ thế Chin phuh kong têa Ƀih pơtối tơmâng, pro tơ’lêi hlâu ăm mơngế Việt Nam a kong têa Ƀih mot tơrŭm cheăng châ tơƀrê ƀă veăng kum ăm mơnhông mơdêk cheăng kâ – rêh ối pơlê pơla Ƀih, ngăn kố cho kông tơdjêp thăm mơnhông tơrŭm cheăng pơla péa tơnêi têa.