Klêi kơ’nâi Leh tơdah kân krip, péa Ngế pro xiâm hnê ngăn tơnêi têa hiăng tơkŭm tơpui tơno. A hneăng hôp tơpui tơno, pôa Phạm Minh Chính, Ngế pro xiâm hnê ngăn tơnêi têa tối phiu ro roh apoăng troh lăm pôu pơtáu kong têa Luxembourg, mơnê tơdroăng tơdah kân krip ƀă khât păng ‘nâng dêi Chin phuh kong têa Luxembourg ăm Khu râ kăn Việt Nam. Ngế pro xiâm hnê ngăn tơnêi têa mơnhên Việt Nam đi đo nhuô̆m tơrŭm cheăng tŭm têk ƀă kong têa Luxembourg, môi khu tơrŭm ki mơjiâng pro, ai hnoăng kal khât dêi Khu tơrŭm châu Âu.

Koh phiu ro pôa Phạm Minh Chính, Ngế pro xiâm hnê ngăn Chin phuh Việt Nam lăm pôu pêi cheăng a kong têa Luxembourg, roh lăm pôu pêi cheăng khu râ kăn xiâm apoăng klêi kơ’nâi 10 hơnăm pơla péa tơnêi têa, Ngế pro xiâm hnê ngăn kong têa cho Xavier Bettel kheăn kơdeăn ki kơnía tung roh lăm pôu pêi cheăng, tối loi tơngah roh lăm pôu pêi cheăng kô djâ tơrŭm cheăng péa tơnêi têa hneăng mơnhông mơdêk nếo.

Péa Ngế pro xiâm hnê ngăn tơnêi têa tối rơdêi ki kal dêi tơdroăng pêi pro châ tơƀrê tơdroăng tơrŭm cheăng hiăng ai, tơdrêng amê hriăn plĕng mơjiâng troăng tơrŭm cheăng tơtro nếo ƀă tơmeăm ki ai hlâu, tơdroăng kal vâ mơnhông mơdêk dêi péa tơnêi têa. Péa pâ môi tuăn thăm pêi pro rĕng mơjiâng tơdroăng tơrŭm ton xŏn ‘na liăn ngân đi đo ai hên, vâ xúa ki rơdêi dêi Luxembourg ‘na kơxô̆ liăn mơ’no cheăng, ki má lối liăn ngân ai hên, vâ tŏng kum Việt Nam pêi pro troăng pêi ton xŏn tơnêi têa ‘na tơdêk châ tơƀrê lĕm ƀă mơ-eăm hbrâ ví kong prâi hơ’lêh, tung mê ai tơdroăng pêi pro mâu tơkêa hiăng pơkâ mơ’no a COP 26.