Péa ngế kăn xiâm pơkuâ môi tuăn mơnhên tơdroăng péa pâ hiăng rĕng pêi pro tơpui tơno ƀă trâm mâ khu râ kăn xiâm ƀă mâu râ klêi kơ’nâi vêh lôu péa hiăng kum hiâm mơno loi tơngah, tah lôi pá puât, po troăng ăm tơrŭm cheăng rơtế rak tơniăn ƀă mơnhông mơdêk, kum rơtế dêi pó mơjiâng tơdroăng cheăng kâ tơniăn krê, pơkuâ xêh, mot tơrŭm lâp plâi tơnêi trâu hơhngế.

Môi tuăn ‘na mâu troăng mơnhông mơdêk ó rơdêi, rơkê tung tơrŭm Việt Nam – Singapore tung mâu kơvâ cheăng, péa kăn xiâm pơkuâ môi tuăn pêi pro trâu hơngế mâu tơdroăng tơrŭm cheăng, ki rơhêng vâ tối cho kal kí, cheăng kâ, gâk kring, cheăng lêng, hnê hriâm, hnê mơjiâng mơngế pêi cheăng ki rơkê, ki má lối cho kăn ƀô̆ râ pêi cheăng ton xŏn, kăn ƀô̆ pơkuâ; thăm trâm mâ pơla kuăn pơlê, mơhnhôk ôm hyô; thăm pêi pro rơdêi mâu troăng tơmiât nếo ‘na tơdjêp pơto tơmeăm a troăng têa kơxĭ; xuân môi tiah thăm tơrŭm cheăng tung mâu kơvâ cheăng nếo tơtro ƀă rơxông kơmăi kơmok 4.0.

Péa pâ xuân tơkêa thăm pêi pro rơdêi tung tơrŭm cheăng tơpui kâ hên troăng môi tiah ASEAN, APEC, Khu lâp kong têa; môi tuăn pơtối tơrŭm mơjiâng Pơlê pơla ASEAN mơnhông mơdêk tơniăn, rŭm môi tuăn, ó rơdêi.