Hâi lơ 19/3, pôa Phạm Minh Chính, Ngế pro xiâm hnê ngăn Chin phuh veăng ƀă xông tơpui a Hneăng hôp tơpui tơno Khu tê mơdró Việt Nam. Ƀă dó inâi ‘’Pơlê pơla khu tê mơdró rơtế Chin phuh Việt Nam tung pêi pro pơkâ tơtêk ngiât’’, hneăng hôp tơpui tơno cho roh tơ’lêi vâ pơlê pơla khu tê mơdró tơbleăng ăm Chin phuh mâu troăng vâ pêi pro pơkâ mơnhông mơdêk cheăng kâ krúa lĕm, krá tơniăn; ai tơkêa, troăng pêi nhên, mơdêk hnoăng cheăng pơlê pơla dêi khu tê mơdró pakĭng tơdroăng pêi pro mơ’no liăn cheăng tê mơdró châ tơƀrê.

Xông tơpui a hneăng hôp tơpui tơno, pôa Phạm Minh Chính tối ăm ‘nâi, hơnăm kố Việt Nam hiăng mot a hơnăm má 3 pêi pro Pơkâ mơnhông mơdêk cheăng kâ – rêh ối pơlê pơla 5 hơnăm 2021 – 2025 ƀă pơkâ tâi tâng cho tơniăn cheăng kâ kân, mơnhông mơdêk rĕng ƀă krá tơniăn. Rơtế ƀă mâu tơdroăng mơ-eăm pơ’lêh pro mơ-éa, pêi cheăng xúa kŏng ngê̆, pro tơniăn tíu mơ’no tê mơdró, Chin phuh Việt Nam pơtối pêi pro rơdêi mot tơrŭm lâp plâi tơnêi, djâ troh hên roh tơ’lêi nếo ăm mâu khu tê mơdró, po tíu mơnhông mơdêk po rơdâ kân ing Tơkêa FTA rơxông nếo djâ ăm.