Khê̆n kơdeăn khât ki mơ-eăm, hnoăng cheăng, tơdroăng hbrâ dêi Khu xiâm ngăn liăn ngân, mâu tơdroăng hnê tối mơnhông tơƀrê mơ-eăm, ‘nâi nhên tơxâng a hneăng hôp,  Ngế pro xiâm hnê ngăn tơnêi têa pơkâ thế tah mâu tơdroăng tơvâ tơvân a mâu hlá mơ-éa chêh pơkâ dêi Luât; pơkâ thế khu xiâm ngăn liăn ngân pêi mơdoh chôu, tơmeăm khoăng, xoăng hnoăng cheăng ăm kăn xiâm pơkuâ ƀă xoăng hnoăng cheăng ăm mâu kăn ƀô̆  ki ai tŭm ivá, hnoăng cheăng pêi tơdroăng mê.

Peăng tơdroăng ki rơnêu, tơ’nôm, Ngế pro xiâm hnê ngăn tơnêi têa vâ môi tuăn ‘na tơdroăng pơkâ  dêi Ngế pro xiâm hnê ngăn liăn ngân ‘na tơdroăng mơjiâng môi luât vâ ‘mâi hơ’lêh, tơ’nôm 7 luât tung kơvâ liăn ngân, pơkâ thế séa ngăn vâ tah mâu tơdroăng ki pá tơvâ tơvân kal pêi tơdrêng, ing mê veăng tah xơpá tung tơdroăng cheăng tê mơdró, mơdêk séa ngăn cheăng kâ ôh tá tơniăn ‘na cheăng kâ kâ, pro tơniăn ƀă mâu khu tơrŭm cheăng kâ kân, mơhnhôk ƀă xúa tơƀrê mâu tơmeăm khoăng ai hlâu vâ mơnhông pêi tro tiô pơkâ, tơdroăng cheăng ki Hneăng hôp má 13 dêi Đảng hiăng pơkâ.