Ngế pro xiâm hnê ngăn tơnêi têa hơlêm ƀă mâu tơdroăng ki hía ki khu râ kăn pơkuâ ƀă kuăn pơlê tung kong pơlê Quảng Ninh hiăng trâm xua kong mêi khía mơhot roh má 3 pro. Ngế pro xiâm hnê ngăn tơnêi têa pói vâ rĕng rơnêu kế tơmeăm khoăng ki tơ’nhê, lŭp xua kong mêi khía mơhot pro ƀă rĕng vêh tơniăn tơdroăng rêh ối kuăn pơlê.

A hneăng hôp kơxo hâi ki mê, Ngế pro xiâm hnê ngăn tơnêi têa hiăng hnê mơhno a ngiâ tŏng gum 100 rơtal liăn ăm rêm kong pơlê Quảng Ninh, Hải Phòng vâ rơnêu kế tơmeăm khoăng xua kong mêi khía mơhot pro. ‘Na troăng pêi, Ngế pro xiâm hnê ngăn tơnêi têa pơkâ kong pơlê Quảng Ninh ƀă pơlê kong kân Hải Phòng mơhnhôk tâi tâng khu cheăng kal kí vâ rơnêu kế tơmeăm khoăng tro lŭp, tơ’nhê xua kong mêi khía mơhot pro, tá khu lêng, Măt trâ̆n Tơnêi têa, mâu khu cheăng kal kí – rêh ối pơlê pơla, ki má lối cho pêi pro mâu tơdroăng cheăng kân tung gô̆m, văng, mơgrúa kong prâi.

Ngế pro xiâm hnê ngăn tơnêi têa pơkâ thế Khu xiâm pơkuâ lêng pơtroh khu lêng a tâi tâng mâu kong pơlê, pơlê kong kơdrâm, tơring ki achê má môi veăng tung tơdroăng cheăng ki chiâng pêi.