Kơxê lơ 18/12, pôa Phạm Minh Chính, Ngế pro xiâm hnê ngăn tơnêi têa lăm pôu, pêi cheăng ƀă Khu xiâm pơkuâ ngăn Mố đô̆i gak tơkăng kong. A rôh pêi cheăng, pôa Phạm Minh Chính khĕn kơdeăn tơdroăng ‘nâi kơdôu mơ-eăm, tơdroăng ki Khu xiâm gak tơkăng kong hiăng châ pêi pro tung hơnăm hdrối; tung la ngiâ, Ngế pro xiâm hnê ngăn tơnêi têa pơkâ thế, xúa ki rơkê mâu tơdroăng pêi pro tung mơjiâng, rak ngăn, kring gak tíu tơkăng kong tiô tơdroăng chal nếo nôkố, tơrŭm rơdêi, rak xúa mâu tơmeăm ki ai luât pơkâ, tơdroăng ki tro ƀă ivá rơdêi dêi khu cheăng kal kí, malối cho ivá rơdêi dêi kuăn pơlê, ki rơdêi dêi tuăn ngôa rơkê, kuăn mơngế ƀă túa lĕm tro Việt Nam, malối  cho ivá rơdêi, mơhno túa lĕm tro dêi mâu hdroâng kuăn ngo ki rêh ối a tíu tơkăng kong.

Pêi tro troăng rơhlâ pơkâ “Xua kuăn pơlê piu dêi tơná, xua kuăn pơlê pêi mâu tơdroăng cheăng kum kuăn pơlê”, đi đo séa ngăn kuăn pơlê, achê kuăn pơlê, tơmâng hnê ngăn nhên tung pơlê cheăm, pêi tro tơdroăng mơhnhôk kuăn pơlê, mơ-eăm veăng mơjiâng tơdroăng kal kí a pơlê cheăm tíu tơkăng kong krá rơdêi, kum kuăn pơlê mơnhông cheăng kâ - rêh ối, kơdroh kơklêa xăm kơtiê, mơjiâng thôn pơlê cheăng kâ rêh ối tiô túa nếo. Tơkŭm mơjiâng Đảng mố đô̆i gak tơkăng kong krúa tơniăn krá rơdêi, tíu pêi cheăng rơdêi tung tŭm tơdroăng.