Kơxê lơ 26/2, pôa Phạm Minh Chính pêi cheăng ƀă Kăn xiâm hnê ngăn kong pơlê Hòa Bình ‘na mơnhông cheăng kâ-rêh ối pơlê pơla. Tối tơbleăng a rôh pêi cheăng, pôa Phạm Minh Chính tơmâng xo, khĕn kơdeăn Đảng ƀô̆, mâu kăn, mâu lêng ƀă kuăn pơlê kong pơlê Hòa Bình hiăng môi tuăn, mơ-eăm pêi châ tơƀrê mâu tơdroăng cheăng kâ rêh ối.

Ngế pro xiâm hnê ngăn tơnêi têa pơkâ thế kong pơlê tơkŭm hnê mơhno, pêi tro hnoăng cheăng pơkâ ƀă mơnhông mơdêk mơjiâng tơmeăm khoăng, ngăn mê cho hnoăng cheăng ki kal ƀă pêi ahdrối dêi kong pơlê; tơmâng ‘no liăn mơnhông mơjiâng tơmeăm khoăng cheăng kâ - rêh ối pơlê pơla malối cho pro troăng prôk.

Ngế pro xiâm hnê ngăn Chin phuh hnê mơhno kong pơlê Hòa Bình thế ai luât pơkâ mơhnhôk tŭm tơdroăng mơnhông; mơdêk rơdêi liăn ngân ‘no mơjiâng tơmeăm khoăng, 3 tơdroăng pơkâ dêi tơnêi têa; pơtối mơdêk ‘mâi hơ’lêh pêi cheăng, hơ’lêh tơdroăng ‘no liăn mơjiâng tơmeăm khoăng; tơmâng mơdêk mâu kơvâ mơhno túa lĕm tro, rêh ối pơlê pơla, kring vế hyôh kong prâi; rak tơniăn rêh ối pơlê pơla, mơdêk tơdroăng rêh ối, pêi lo tơmeăm khoăng ƀă mơnhông ki rơkê dêi tuăn hiâm kuăn pơlê, rak vế ƀă pơtối rak ki kơnía ‘na mơhno túa lĕm tro.