Tung tơdroăng pêi cheăng a kong pơlê Bình Định, kơxê lơ 5/2, pôa Phạm Minh Chính, Ngế pro xiâm hnê ngăn Chin phuh pêi cheăng ƀă Khu râ kăn pơkuâ kong pơlê Bình Định ‘na tơdroăng châ tơƀrê hơnăm 2022, hnoăng cheăng mơnhông mơdêk cheăng kâ – rêh ối pơlê pơla hơnăm 2023; tơleăng tơdroăng pâ thế vâ tŏng kum kong pơlê Bình Định mơnhông mơdêk lĕm tơmeăm ki ai hlâu, ki rơdêi, mơnhông mơdêk rĕng, krá tơniăn.

Mơgêi roh pôu pêi cheăng, pôa Phạm Minh Chính, Ngế pro xiâm hnê ngăn Chin phuh mơnhên, kheăn kơdeăn Đảng ƀô̆, khu râ kăn pơkuâ ƀă Kuăn pơlê kong pơlê Bình Định hiăng rŭm môi tuăn, mơ-eăm ƀă châ tơƀrê hên ‘na cheăng kâ – rêh ối pơlê pơla, kum tung tơdroăng châ tơƀrê tơdjuôm dêi tơnêi têa.

Ngế pro xiâm hnê ngăn tơnêi têa pơkâ thế Bình Định kal pêi tiô tơdroăng nôkố vâ ai mâu troăng hơlâ lĕm tâ; mơnhông mơdêk hiâm mơno mơ-eăm xêh, ivá ó rơdêi Tây Sơn; pơtối pêi pro xing xoăng râ, xing xoăng hnoăng; pro rơdêi pơ’lêh nếo tơmiât pêt rơkê, xúa khoa hok kŏng ngê̆; mơnhông mơdêk cheăng kâ xúa kơmăi kơmok, cheăng kâ krúa lĕm, cheăng kâ đi đo châ tơƀrê; tơtrŏng tung tơdroăng mơjiâng Đảng, khu cheăng kal kí.