Kơxê lơ 16/3, a tíu pêi cheăng Chin phuh, pôa Phạm Minh Chính, Ngế pro xiâm hnê ngăn Chin phuh pơkuâ po rôh pêi cheăng ƀă mâu kăn teăng mâ, Kăn pơkuâ Kơ koan teăng mâ Việt Nam a kong têa ê hơnăm 2023 – 2026 hdrối vâ lăm xo pêi dêi hnoăng cheăng. Tiô Khu xiâm tơpui kâ, 16 ngế kăn teăng mâ, kăn pơkuâ kơ koan teăng mâ Việt Nam a kong têa ê nếo châ pôk rôh kố pơkuâ pêi a 48 to kong tea, kơpong tơnêi tơníu a tâi tâng mâu kơpong.

A rôh pêi cheăng, pôa Phạm Minh Chính, Ngế pro xiâm hnê ngăn Chin phuh tối nhên, mâu hơnăm hdrối nah, kơvâ cheăng tơpui kâ ôh tá la lâi pơtê xông rơdêi, veăng kum kal khât tung pơla mơjiâng tơnêi têa, tung mê ai tơdroăng veăng kum dêi mâu Kơ koan teăng mâ Việt Nam a kong têa ê rế hía rế hngăm. Xua mê, mâu kăn teăng mâ, ngế xiâm pơkuâ Kơ koan teăng mâ Việt Nam a kong têa ê athế mơ-eăm ƀă rơkê pêi pro mâu troăng hơlâ pơkâ tơpui kâ dêi Đảng, Tơnêi têa, rêm ngế xiâm pơkuâ Kơ koan teăng mâ kal mơnhên tơpui ‘na cheăng kâ kum mơnhông mơdêk, veăng kum mơjiâng cheăng kâ tơniăn krê, pơkuâ séa ngăn xêh ƀă hbrâ rơnáu kơhnâ tơrŭm cheăng kâ ƀă kong têa ê trâu rơdâ, tâi tâng ƀă tơƀrê cho môi tơdroăng ki kơjo kum apoăng tung hneăng hơnăm pêi cheăng dêi tơná.