Klăng roh veăng Hneăng hôp khu râ kăn xiâm leh tơbâ 45 hơnăm tơrŭm cheăng ASEAN – EU a Bruxelles, kong têa Ƀih, pôa Phạm Minh Chính, Ngế pro xiâm hnê ngăn tơnêi têa hiăng ai roh pêi cheăng ƀă Ngế pro xiâm hnê ngăn kong têa Lếo Phankham Vinphavanh ƀă Ngế pro xiâm hnê ngăn Chin phuh kong têa Kul Samdech Techo Hun Sen. A roh trâm mâ, pái Ngế pro xiâm hnê ngăn tơnêi têa hiăng tối tơbleăng ăm dêi pó ‘na tơdroăng tơrêm kong têa, tơpui tơno ‘na mâu troăng vâ thăm tơrŭm pơla pái kong têa tung mơnhông mơdêk cheăng kâ – rêh ối pơlê pơla, xuân môi tiah mâu tơdroăng lâp plâi tơnêi ƀă kơpong rơtế rơhêng vâ ‘nâi plĕng.

Pái Ngế pro xiâm hnê ngăn tơnêi têa môi tuăn rơtế dêi pó thăm mơjiâng tơdroăng cheăng kâ tơniăn krê, pơkuâ xêh tơrŭm ƀă mot tơrŭm lâp plâi tơnêi tŭm têk; thăm tơdjêp châ tơƀrê pái tơdroăng cheăng kâ, ngăn kố cho mâu tơdroăng kơjo troăng pêi ton xŏn dêi pái kong têa tung la ngiâ.

Pái Ngế pro xiâm hnê ngăn tơnêi têa môi tuăn pơtối rak, trâm mâ pơla péa pâ, pái pâ đi đo, tung mê ai tơdroăng tơrŭm rĕng tơkŭm po Hneăng hôp Khu râ kăn xiâm ‘na pái kong têa mơnhông mơdêk Kul – Lếo – Việt Nam roh má 12 (a kong têa Kul) ƀă thăm pêi pro Pơkâ pêi tơdjêp pái kong têa cheăng kâ Kul  - Lếo – Việt Nam troh hơnăm 2030.