Kơxo lơ 1/12, ing pơkuâ dêi pôa Phạm Minh Chính, Ngế pro xiâm hnê ngăn tơnêi têa, Chin phuh hôp tiah hmâ khế 11/2022. Mơgêi roh hôp, pôa Phạm Minh Chính, Ngế pro xiâm hnê ngăn tơnêi têa hiăng tối tơdroăng lâp plâi tơnêi ƀă tung tơnêi têa, tơdrêng amê tối nhên, mâu tơdroăng ki u ối, pá puât, pơloăng mơnúa. Ngế pro xiâm hnê ngăn tơnêi têa pơkâ, pêi tiô Pơkâ Hneăng hôp má XIII dêi Đảng, tơdroăng pơkuâ, hnê mơhno, mâu Pơkâ, Mơgêi dêi Tơnêi têa, Kuô̆k hô̆i, Chin phuh; pêi pro nhên mâu troăng pơkâ pêi, troăng hơlâ tung tơdroăng, hnoăng cheăng dêi mâu râ, mâu kơvâ cheăng, mâu kong pơlê.

Pơtối môi tuăn pơkâ pêi rak krá tơniăn tơdroăng cheăng kâ kân, mơdât tơdroăng liăn chu rơpâ yă, thăm mơnhông tơtêk, tơniăn mâu tơdroăng tơdâng kân dêi tơdroăng cheăng kâ. Ki rơhêng vâ tối, Ngế pro xiâm hnê ngăn tơnêi têa pơkâ, rak tơniăn dâi lĕm, tơdroăng pêi pro mâu tơdroăng tơkêa bro, tơdroăng xiâm tơbleăng Khu xiâm kal kí, Khu pơkuâ hnê ngăn cheăng Đảng, Hneăng hôp Tơnêi têa. Hlê plĕng tŭm tâi tâng tơdroăng hnê mơhno, pơkuâ ƀă pêi pro tơdroăng nôkố, rĕng ‘nâi tơdroăng nôkố, pêi pro mâu troăng hơlâ teăm tơdrêng, tơtro.