Kơxê lơ 5/12, a tíu pêi cheăng dêi Chin phuh, pôa Phạm Minh Chính, Ngế pro xiâm hnê ngăn Chin phuh hiăng tơdah pôa Yemi Osinbajo,  Kăn xiâm phŏ pơkuâ kong têa Nigeria dế ai rôh lăm pôu pêi cheăng a Việt Nam sap hâi lơ 5 troh lơ 7/12/2022. A rôh tơdah, pôa Phạm Minh Chính, Ngế pro xiâm hnê ngăn tơnêi têa khĕn kơdeăn khât mâu hnoăng pêi ki kal ki Nigeria hiăng châ pơtối pêi tơniăn ‘na kal kí, mơnhông cheăng kâ - rêh ối, hbrâ ví ƀă pơreăng kân COVID - 19, pơtối rak ki rơdêi cho môi tung kong têa ki cheăng kâ kân má môi châu Phi.

Tơpui ‘na mâu tơdroăng ki nhên vâ mơdêk tơrŭm pơla péa pâ, Ngế pro xiâm hnê ngăn Chin phuh pơkâ thế péa pâ kal tơrŭm krá vâ djâ tơdroăng tơrŭm tung hên kơvâ cheăng pơla péa tơnêi têa prôk tiô troăng trâu rơdâ, khât ƀă hlối tơƀrê ing mâu khu tơdroăng pêi môi tiah mơdêk trâm mâ, tơpui tơno vâ thăm hlê dêi rơpó, nhoăm dêi rơpó ƀă mơdêk rôh ki tơ’lêi tơrŭm tung mâu kơvâ cheăng dêi tơrêm to tơnêi têa ki tơdroăng cheăng rơdêi tơ’nôm ăm dêi rơpó, malối cho cheăng kâ.

Tơpui tơno ‘na mâu tơdroăng lâp plâi tơnêi ƀă tung kơpong, péa pâ tối nhên ki kal dêi tơdroăng tơleăng mơnhên ki tơbriât dêi rơpó ƀă tơdroăng po hôp tơpui hơniâp pro i lĕm thế pro tro tiô luât pơkâ dêi lâp plâi tơnêi.