Pôa Phạm Minh Chính, Ngế pro xiâm hnê ngăn tơnêi têa hiăng kơto plong mot tung kơpong kuăn pơlê rêh ối ki tro têa lân xua kong mê khía mơhot kân plong mot, mơhnhôk kuăn pơlê mâu cheăm Tam Đa ƀă cheăm Vạn An, tơring Yên Phong, kong pơlê Bắc Ninh, ƀă cheăm Tiên Sơn, cheăm Vân Hà, pơlê kong krâm Việt Yên, kong pơlê Bắc Giang, tơdrêng amê, hlối pơkâ thế khu kăn pơkuâ cheăm tơring, kong pơlê dêi péa to kong pơlê ‘mâi xĕn kuăn pơlê troh tíu ối tơniăn, pôi tá ăm kuăn pơlê kơklêa, ôh tá ai ếo xâp.

Klêi kơ’nâi mê, Ngế pro xiâm hnê ngăn tơnêi têa hiăng troh a tíu pêi cheăng dêi Vi ƀan hnê ngăn pơlê kong krâm Việt Yên, kong pơlê Bắc Giang ƀă hnê mơhno tơkŭm hôp ‘no tơdrêng ing troăng hyôh internet tơdrêng ƀă mâu kong pơlê ki tro tơdjâk dêi kong mê khía mơhot plong mot, mê cho: Bắc Ninh, Bắc Giang, Lào Cai, Hoà Bình, Sơn La, Lai Châu, Điện Biên, Hà Giang, Cao Bằng, Bắc Kạn, Yên Bái, Tuyên Quang, Phú Thọ, Thái Nguyên, Lạng Sơn.

Pôa Phạm Minh Chính, Ngế pro xiâm hnê ngăn tơnêi têa pơtroh rơkong sĭng khéa troh mâu rơpŏng hngêi ki ai ngế trâm xâu xía xua kong mê khía mơhot plong mot ƀă tơnêi tơhnah tơhnâp, tơdrêng amê hlối pơkâ thế mâu tơring, cheăm pêi pro tro troăng hơlâ tŏng gum kuăn pơlê teăm tŏng gum tơdrêng ki dâi khât.