Kơxo lơ 8/8, mơgêi a roh Hôp Khu hnê mơhno Tơnêi têa mâu tơmeăm, tơdroăng tơkêa bro ki kal tơnêi têa kơvâ troăng klông ƀă rơxế kơtâu.

Pôa Phạm Minh Chính, Ngế pro xiâm hnê ngăn tơnêi têa pơkâ mâu khu mơ’no liăn cheăng, mâu khu ki mơjiâng pro tơrŭm ƀă mâu kong pơlê rĕng tah lôi mâu tơdroăng pá puât, pơloăng mơnúa, tah lôi mâu tơdroăng pá puât mâu tơdroăng tơkêa bro troăng kân nôkố.

Tâi tâng tơdroăng tơkêa bro troăng kân ăm phêp rơxế kơtâu têi dế châ pêi pro dâng 1.700 km tung lâp tơnêi têa, tung mê, ai dâng 1.200 km tiô tối hdrối kô kêi đeăng a hơnăm 2025 vâ châ tâi tâng kơxô̆ km troăng kân ăm phêp rơxế kơtâu têi tâk lối 3.000 km. Ngế pro xiâm hnê ngăn tơnêi têa pơkâ, mâu khu xiâm, kơvâ cheăng, kong pơlê, ki má lối cho mâu khu mơ’no liăn cheăng, mâu khu ki mơjiâng pro thăm môi tuăn, pêi pro tơdroăng tơ’noăng ‘’500 hâi măng pêi cheăng kêi đeăng ƀlêi trâng mâu tơdroăng tơkêa bro troăng kân ăm phêp rơxế kơtâu têi’’ vâ koh phiu ro Hneăng hôp Đảng mâu râ, la ngiâ tơkŭm po Hneăng hôp Đảng tâi tâng tơnêi têa roh má XIV, leh tơbâ 80 hơnăm Hâi mơjiâng tơnêi têa, 50 hơnăm Hâi tơleăng lĕm peăng Hdroh tơnêi têa.