Tung rôh lăm pôu kong têa Bih, pôa Phạm Minh Chính, Ngế pro xiâm hnê ngăn tơnêi têa hiăng hôp tơpui tơno ƀă jâ Stephanie D’Hose, Kăn hnê ngăn Kuô̆k hô̆i Ƀih. Péa pâ hâk mơnê mâu tơdroăng hiăng châ pêi pro tơdroăng kĭ tơhrâ tơniăn tê mơdró Việt Nam - EU pro pơxúa klêi péa pâ tơbleăng; vâ môi tuăn pơtối mơdêk tơrŭm cheăng tung kơvâ ’no liăn cheăng tê mơdró pơla péa tơnêi têa ƀă hlối rơtế ƀă dêi rơpó hbrâ ví ƀă tơdroăng pơloăng mơnúa tơdjuôm môi tiah hyôh kong prâi, mơdât hyôh kong prâi hơ’lêh, malối a kơpong tơbăng kroăng Cửu Long.

Rôh kố, Ngế pro xiâm hnê ngăn Chin phuh pơkâ thế Kăn hnê ngăn Kuô̆k hô̆i Ƀih rĕng pê klêi tơdroăng kĭ tơhrâ rak tơniăn ‘no liăn cheăng pơla Việt Nam- EU vâ tơdroăng ‘no liăn cheăng tơ‘lêi hlâu ăm khu mơdró péa tơnêi têa, môi tuăn ƀă Vi ƀan châu Âu rĕng tah “theh trĭng’’ ƀă ká xi xống Việt Nam.

Pôa Phạm Minh Chính pơkâ thế Kăn xiâm hnê ngăn Kuô̆k hô̆i râ má môi Bih pơtối pro tơ’lêi hlâu ăm mơngế Việt Nam ki dế rêh ối hriâm tâp ƀă pêi cheăng  a kong têa Ƀih, pơtối rak hnoăng ki tơdjêp pơla péa tơnêi têa.