Hneăng lăm pôu Algeria dêi pôa Phạm Minh Chính rôh kố ai pơxúa kal khât tung tơdroăng mơdêk tơrŭm cheăng pơla péa tơnêi têa rế tâk tâ nếo, po rơxông tơrŭm cheăng trâu rơdâ  hlối rơkê ƀeăn. Kố cho rôh vâ péa pâ tơpui tơno, kĭ tơhrâ mâu hlá mơ-éa tơrŭm cheăng ki nếo, malối tung mâu kơvâ ki Việt Nam ƀă Algeria ai hên tơmeăm khoăng vâ pêi cheăng xông rơdêi ƀă púi vâ tơ’nôm ăm dêi rơpó, môi tiah on tơhrik, têa châu, pêi chiâk, chiâ xo tơmeăm khoăng tung kơdâm tơnêi, pro kế kâ ƀă mâu kơvâ cheăng kơmăi kơmok mơjiâng pro.

Pakĭng mê, tơdroăng mơnhông mâu rôh tơrŭm cheăng  kâ, mâu rôh hôp tơpui tơno tê mơdró ƀă mâu tơdroăng tơkêa tơrŭm tê mơdró kô veăng kum mơnhông tơrŭm cheăng pơla Việt Nam - Algeria rế tâk tâ nếo.