Kơxê lơ 16/12, pôa Phạm Minh Chính, Ngế pro xiâm hnê ngăn tơnêi têa ƀă Khu kăn xiâm tơnêi têa Việt Nam hiăng troh a Hà Nội, hiăng klêi tơniăn rôh lăm pêi cheăng a châu Âu veăng Hôp ƀă mâu kăn xiâm troh leh tơbâ 45 hơnăm tơrŭm cheăng tung Khu mâu kong têa Đông Nam Á (ASEAN) - Tơrŭm cheăng châu Âu (EU) ƀă lăm pôu kong têa Luxembourg, kong têa Hà Lan, kong têa Bih. Rôh lăm pôu dêi pôa Phạm Minh Chính, Kăn xiâm hnê ngăn tơnêi têa hdró tơdroăng ki kal tung tơrŭm cheăng dêi Việt Nam ƀă Luxembourg, Bih, Hà Lan.

Kum mơdêk loi nhoăm tơdroăng kal kí, mơdêk tâi tâng tŭm tơdroăng tơrŭm pơla Việt Nam ƀă 3 to kong têa tung pơla mơnhông mơdêk nếo rế ton rế trâu rơdâ, ai pơxúa khât, pơxúa kring tơniăn - mơnhông Việt Nam ƀă veăng ‘no hnoăng pro hơniâp lĕm, rak tơniăn, tơrŭm ƀă mơnhông mơdêk a kơpong ƀă lâp plâi tơnêi.

Hneăng hôp mâu Kăn xiâm troh leh tơbâ 45 hơnăm tơrŭm cheăng ASEAN - EU ai pơxúa khât, cho rôh ki tro vâ mâu kăn péa pâ pơkâ troăng rơhlâ ki kal vâ mơnhông rơdêi tâ nếo tơrŭm cheăng pơla ASEAN - EU tung la ngiâ.