Ngế pro xiâm hnê ngăn tơnêi têa hiăng troh lăm ngăn mâu khu mơdró a kơpong cheăng kâ Nhơn Hội ƀă mơhnhôk kuăn pơlê a cheăm Đề Gi, kơno tuk cá Đề Gi, kơpong pro pơlê nếo An Quan tro tơdjâk xua khía mơhot kân má 13. Lăm ngăn a kơpong cheăng kâ Nhơn Hội, Ngế pro xiâm hnê ngăn tơnêi têa pơkâ thế kong pơlê mơhnhôk mâu lêng, hbrâ tơmeăm rĕng pêi mơgúa a mêi khía pro tơ’nhiê, ‘mâi mơnhông pêi chiâk, tê mơdró, tơniăn ăm mơngế pêi cheăng.  

Ngế pro xiâm hnê ngăn tơnêi têa ăm ‘nâi, hiăng hnê mơhno hngêi rak liăn ai mâu kơxô̆ liăn mung kơdroh liăn rơkâ kơjo kum khu mơdró kơdroh ki tro lŭp; kơvâ ngăn liăn ngân tí tăng ngăn hôm ai mâu luât kơdroh pro hnoăng mơhá, nâp liăn ‘na tơdroăng ki kố ki mê; mơ-eăm pơtối rak tơniăn tơdroăng rêh ối dêi mơngế pêi cheăng. Lăm pôu ngăn mâu rơpŏng kuăn pơlê ki tro tơdjâk têa rơlân lu, tro lŭp tơmeăm a cheăm Đề Gi, Ngế pro xiâm hnê ngăn tơnêi têa pơkâ thế râ ủi Đảng, mâu kăn, mâu lêng, kŏng an tung cheăm kum kuăn pơlê mơgrúa văng, ‘mâi rơnêu hngêi trăng, malối thế rak tơniăn tung cheăng kâ ăm kuăn pơlê, ‘mâi mơnhông pêi chiâk tê mơdró; kum kuăn pơlê châ mung liăn, liăn rơkâ iâ, ăm kuăn pơlê mung hdrê pêt, mơnăn păn, malối cho păn xi xŏng.

Ngế pro xiâm hnê ngăn tơnêi têa púi vâ kuăn pơlê pơtối ‘na rak tuăn ‘nâi mơ-eăm prôk tơkâ luâ tơdroăng pá, mơ-eăm tâ nếo vâ mơnhông tung rê ối. Rôh tơbâ 95 hơnăm Hâi mơjiâng Măt trâ̆n kuăn ngo rŭm môi tuăn Việt Nam, nôkố cho Măt trâ̆n Tơnêi têa Việt Nam, pôa Phạm Minh Chính veăng leh trâm mâ hâi Tơrŭm môi tuăn tâi tâng kuăn pơlê ƀă kuăn pơlê a kơpong Thắng Kiên, cheăm Đề Gi, kong pơlê Gia Lai.

Tối nhên mơjiâng, ‘mâi mơnhông tơrŭm môi tuăn, mơhnhôk kuăn pơlê veăng kum dêi rơpó tơkâ luâ xơpá, Ngế pro xiâm hnê ngăn tơnêi têa ăm ‘nâi “Tơnêi têa rơtế tơmâng, cheăm kong pơlê veăng tơmâng kum, kuăn pơlê rơtế veăng tơmâng”; tơdjuôm dêi rơpó pêi pro, tơkâ luâ mâu tơdroăng pá, pơloăng mơnúa, pơtối rak mâu tơdroăng pêi pro ki rơdêi, rơtế xua ki sôk ro, hơniâp. Kơhâi dế ki mê, pôa Phạm Minh Chính hiăng lăm pôu ngăn,  hlối pêi cheăng ƀă Mố đô̆i tơkăng kong dêi kong pơlê Gia Lai.