Pôa Phạm Minh Chính, Ngế pro xiâm hnê ngăn tơnêi têa nếo ai roh lăm pôu pêi cheăng ƀă Khu pơkuâ cheăng Đảng kong pơlê Thừa Thiên Huế. Tiô tơbleăng, pái khế apoăng hơnăm kố, tơdroăng cheăng kâ – rêh ối pơlê pơla kong pơlê Thừa Thiên Huế pơtối ai hên tơdroăng cheăng châ tơƀrê, tung mê ai tâi tâng kơxô̆ liăn mơ’no lâp pơlê pơla châ dâng 5 rơpâu rơtal liăn, tâk lối 9% tâng pơchông ƀă roh kố hơnăm nah, xo hnoăng liăn ngân tơnêi têa tâk 3,5%.

Pôa Phạm Minh Chính, Ngế pro xiâm hnê ngăn tơnêi têa kheăn kơdeăn tơdroăng mơ-eăm ƀă tơdroăng châ tơƀrê dêi Đảng ƀô̆, khu râ kăn pơkuâ, mô đô̆i ƀă kuăn pơlê kong pơlê Thừa Thiên Huế, kum kal khât tung tơdroăng châ tơƀrê tơdjuôm dêi lâp tơnêi têa. Tung la ngiâ Ngế pro xiâm hnê ngăn tơnêi têa pơkâ, hlê plĕng, pêi pro châ tơƀrê Pơkâ Hneăng hôp XIII dêi Đảng, Pơkâ hneăng hôp Đảng ƀô̆ kong pơlê.

Cho kong pơlê ai hên tơmeăm mơnhông mơdêk, ki má lối cho ‘na cheăng kâ têa kơxĭ, ôm hyô khôi túa lĕm mơnhông mơdêk – loăng pơlái kong kế, kong pơlê thế tơtrŏng mơnhông mơdêk tơtro cheăng kâ – khôi túa lĕm tro – rêh ối pơlê pơla ƀă rak vế kong prâi ƀă tơniăn cheăng lêng, gâk kring; tơtrŏng tung tơdroăng mơjiâng Đảng ƀă mơjiâng kơ koan pơkuâ tơnêi têa rŭm môi tuăn, chiâng môi, tơdrăng lĕm, kuăn pơlê pơkuâ dêi hnoăng cheăng, châ tơƀrê.