Pôa Phạm Minh Chính, Ngế pro xiâm hnê ngăn tơnêi têa lăm pôu pêi cheăng Tíu xiâm pơ’lêh nếo tơmiât pêi rơkê tơnêi têa NIC dêi Khu xiâm pơkuâ túa cheăng ƀă mơ’no liăn cheăng ƀă pêi cheăng tơdroăng hriăn plĕng mơjiâng kŏng ngê̆ rơxông nếo dêi Viettel. Xông tơpui a kố, pôa Phạm Minh Chính, Ngế pro xiâm hnê ngăn tơnêi têa tối rơdêi, Pơkâ Hneăng hôp roh má XIII dêi Đảng tối nhên, mơnhông mơdêk tơnêi têa krá tơniăn tiô khoa hok kŏng ngê̆ ƀă pơ’lêh nếo tơmiêt pêi rơkê. Ngế pro xiâm hnê ngăn tơnêi têa tối kal hriăn plĕng slogan dêi Tíu xiâm cho ‘’tơkŭm tuăn ngôa rơkê ƀă troh lâp lu ki pơxúa pơ’lêh nếo tơmiêt pêi rơkê Việt Nam’’.

Pơtối mê, pôa Phạm Minh Chính, Ngế pro xiâm hnê ngăn tơnêi têa lăm pôu Grup pơkuâ Kơmăi kơmok – Hyôh măng Mô đô̆i (Viettel) ƀă pêi cheăng ‘na tơdroăng hriăn plĕng mơjiâng pro kŏng ngê̆ rơxông nếo dêi Viettel. A kố, Ngế pro xiâm hnê ngăn tơnêi têa pơkâ thế Viettel pơtối pêi pro tơtro tâ nếo troăng tơmiêt pêi la ngiâ ƀă hnoăng cheăng dêi tơná tung pêi pro hnoăng cheăng châ pơcháu.

Tung mê, thế tơkŭm mơjiâng ƀă mơnhông mơdêk, cho ki xiâm mơjiâng tôh hôp kơmăi kơmok cheăng lêng kŏng ngê̆ rơxông nếo; mơjiâng, mơnhông mơdêk kơmăi kơmok mơjiâng tơmeăm cheăng lêng, kum pêi pro hnoăng cheăng djâ Việt Nam chiâng môi tơnêi têa pêi cheăng xúa kơmăi kơmok mơnhông mơdêk; angiâ kum hên, châ tơƀrê pơ’lêh pêi cheăng xúa kŏng ngê̆ tơnêi têa ƀă mâu tơdroăng ki xiâm mơjiâng Chin phuh pêi cheăng xúa kŏng ngê̆, pơlê pơla xúa kŏng ngê̆; rak hnoăng djâ troăng ahdrối tung tơdroăng pêi cheăng xúa kŏng ngê̆; mơjiâng tơdroăng kal tơnêi têa; thăm kum rêh ối pơlê pơla, tơniăn troăng hyôh măng Internet.