Kơxo lơ 15/3, a Hà Nội, pôa Phạm Minh Chính, Ngế pro xiâm hnê ngăn tơnêi têa pơkuâ Hneăng hôp lâp tơnêi têa ‘na ôm hyô hơnăm 2023 ƀă dó inâi ‘’Thăm pêi pro rơdêi pro tơniăn – Tơtêk  mơnhông mơdêk’’. Hneăng hôp châ tơkŭm po tơdrêng a Tíu pêi cheăng Chin phuh ƀă mơ’no tơdrêng tung um tiô troăng hyôh măng ƀă tíu hrik hyôh 63 kong pơlê, pơlê kong kơdrâm ối tung tơnêi têa.

Xông tơpui a hneăng hôp, pôa Phạm Minh Chính tối rơdêi, Kố cho Hneăng hôp ki kơnâ kal khât ƀă châ hnê mơhno hbrâ ing rĕng ƀă hên tơdroăng pói vâ ‘na mâu troăng pro tơniăn lĕm, mơnhông mơdêk rơdêi dêi ôm hyô ƀă ing mê, kum hên tung tơdroăng mơnhông mơdêk mâu kơvâ, mâu hnoăng ki tơdjâk, xuân môi tiah mơnhông mơdêk cheăng kâ – rêh ối pơlê pơla tơnêi têa tối tơdjuôm.

Ngế pro xiâm hnê ngăn tơnêi têa tối nhên, hơnăm 2023 ƀă tung la ngiâ, mâu tơdroăng ki pro pá mot lo ngi kong têa ê xua COVID-19 kô châ xut tah lôi. Tơdroăng kố kô djâ mâu roh tơ’lêi, hlâu laga xuân hên pá puât, pơloăng mơnúa, tơxup tơbriât pơla pin ƀă tíu ôm hyô ki ê.