Xông tơpui a hneăng hôp, pôa Phạm Minh Chính, Ngế pro xiâm hnê ngăn tơnêi têa tối nhên, pơkâ hlê plĕng pêi pro tŭm, pêi pro tơdâng tơ’mô, kơtăng, châ tơƀrê mâu hnoăng cheăng, troăng pêi tiô Mơgêi dêi Tơnêi têa, Khu xiâm kal kí, Pơkâ dêi Kuô̆k hô̆i, Chin phuh;  krá chân, mơ-eăm pêi pro ƀlêi trâng mâu pơkâ, pơkâ pêi, hnoăng cheăng mơnhông mơdêk cheăng kâ – rêh ối pơlê pơla hơnăm 2023 hiăng pơkâ mơ’no.

Tung mê, mâu hnoăng cheăng kal kí ki kal cho thăm mơ’no liăn cheăng tơnêi têa ƀă pêi pro Tơdroăng rak tơniăn ƀă mơnhông mơdêk cheăng kâ – rêh ối pơlê pơla, 03 tơdroăng pơkâ pêi tơnêi têa. Ngế pro xiâm hnê ngăn tơnêi têa tối rơdêi, mâu hnoăng cheăng kố ai hnoăng kal khât ‘na tá cheăng kâ, kal kí, rêh ối pơlê pơla, cheăng lêng, gâk kring, tah lôi tơdroăng pá puât, mơjiâng cheăng kâ – rêh ối pơlê pơla, djâ mơ’no liăn cheăng, po tíu mơnhông mơdêk nếo, thăm tơdjêp, rak tơniăn cheăng kâ kân, xăm kơklêa kơdroh kơtiê, mơdêk ivá dêi tơnêi têa, mơjiâng ivá ăm pro tơniăn rĕng ƀă mơnhông mơdêk krá tơniăn.