Kơxê lơ 30/11, pôa Nguyễn Xuân Phúc Ngế pro xiâm hnê ngăn Chin phuh hôp mơ’no tơdrêng tơdroăng cheăng tơpui kâ vaccine. Ing môi tơnêi têa ai kơxô̆ mơngế pâk vaccine iâ, Việt Nam hiăng pơ’lêh tơdroăng, chiâng môi tung 6 to kong têa ai hên ngế pâk vaccine má môi lâp plâi tơnêi. Tối mơgêi hneăng hôp, pôa Phạm Minh Chính tối nhên, troh nôkố, pin hiăng kâi mơdât pơreăng COVID-19, teăng mâ Chin phuh, Ngế pro xiâm hnê ngăn tơnêi têa mơnê ƀă khĕn kơdeăn khât veăng ‘no hnoăng dêi kơvâ cheăng tơpui kâ ƀă tơdroăng tơpui vaccine, ‘no hnoăng tơmâng khât a tơdroăng cheăng hbrâ mơdât pơreăng.

Ngế pro xiâm hnê ngăn tơnêi têa tối nhên, tung la ngiâ, pơreăng kân COVID-19 xuân hâi kâi tâi, xuân ối tâ tú rơ-iô tung lâp plâi tơnêi. Pin pôi tá tơngôu, thế pơtối mơ-eăm tơplâ mơdât pơreăng, pêi ahdrối tơdroăng séa ngăn mơdât pơreăng COVID-19 ƀă mơdât pơreăng ki ê. Xua mê, pin thế pơtối tơpui tơno pâ ‘na vaccine; rôe vaccine xuân cho mơhnhôk tơpui kâ. Ngế pro xiâm hnê ngăn tơnêi tối nhên, thế mơdêk cheăng kŏng ngê̆ vâ pro xiâm tung pêi pro vaccine.