A roh hôp  má 12 Khu hnê mơhno, pôa Phạm Minh Chính - Ngế pro xiâm hnê ngăn tơnêi têa hiăng pơcháu 57 tơdroăng cheăng ăm mâu khu xiâm, kơ koan, kong pơlê, tung mê ai 11 tơdroăng cheăng pêi tiô khế hơnăm pơkâ. Pakĭng mê, Ngế pro xiâm hnê ngăn Chin phuh, mâu ngế pro xiâm phŏ  hiăng ai 12 hlá mơ-éa chêh hnê mơhno tơbleăng pêi mâu pơkâ ai tơdjâk troh mâu tơdroăng tơkêa bro, tơmeăm khoăng.

Ngế pro xiâm hnê ngăn tơnêi têa ăm ‘nâi, mâu tơdroăng cheăng  dế tơbleăng pêi nôkố hâi klêi, kal pơtối mơ-eăm  vâ ai tiô pơkâ, koh hneăng hôp Đảng rêm râ, troh hneăng hôp Đảng tung lâp tơnêi rôh má 14, tơbâ 80 hơnăm Hâi mơjiâng tơnêi têa, 50 hơnăm Hâi châ tơleăng lĕm peăng Hdroh lâp tơnêi têa tơrŭm môi.

Ngế pro xiâm hnê ngăn Chin phuh pơkâ thế mâu ngế tung khu hnê mơhno, mâu kăn veăng hôp tơkŭm séa ngăn, tối nhên mâu tơdroăng cheăng châ pơcháu ƀă hnê mơhno, pêi tơdroăng tơkâ luâ xơpá tơvâ tơvân, rĕng tơbleăng mâu tơdroăng vâ pêi tung la ngiâ.