Kơxo lơ 16/2, a Bến Tre, pôa Phạm Minh Chính - Ngế pro xiâm hnê ngăn tơnêi têa pơkuâ pêi cheăng ƀă mâu kăn xiâm kong pơlê Bến Tre vâ tối tơdroăng hiăng pêi pro mơnhông cheăng kâ - rêh ối hơnăm 2022 ƀă tơpui ‘na tơdroăng vâ pêi tung hơnăm 2023; tơleăng mơnhên tơdroăng pá, tơvâ tơvân ƀă pâ thế kơjo kum Bến Tre mơnhông rĕng, krá tơniăn. A rôh pêi cheăng, Ngế pro xiâm hnê ngăn tơnêi têa tối tiah kố, ƀă troăng rơhlâ mơnhông tro, tơdrêng ƀă ki mơ-eăm khât, hnoăng cheăng pêi dêi tâi tâng khu cheăng kal kí, ai veăng pêi khât dêi khu mơdró ƀă kuăn pơlê tung kong pơlê Bến Tre kô pơtối rak ki môi tuăn, hriăn mơ-eăm “xông rơdêi” pro xiâm ƀă “Mơ-eăm” xông mơdêi “pơxiâm pêi cheăng nếo’’ vâ Bến Tre chiâng kong pơlê mơnhông tơƀrê tung kơpong tơbăng kroăng Cửu Long a hơnăm 2025 ƀă dêi lâp tơnêi têa a hơnăm 2030.

‘Na mâu tơdroăng pơkâ dêi kong pơlê Bến Tre ing mâu tơdroăng hnê tối dêi mâu kăn khu xiâm, kơvâ cheăng xiâm Tơnêi têa, Ngế pro xiâm hnê ngăn tơnêi têa vâ môi tuăn tŏng kum mâu tơdroăng pâ thế dêi kong pơlê, ing tơdroăng  pơkâ tơniăn tro tiô pơkâ dêi luât; pro xiâm po troăng, mơhnhôk tăng xiâm ki kum mơnhông mơdêk dêi kong pơlê.