Kơxo lơ 3/3, pôa Phạm Minh Chính, Ngế pro xiâm hnê ngăn Chin phuh pơkuâ po rôh hôp Chin phuh tiah hmâ khế 2/2023. Tơpui a rôh hôp, Ngế pro xiâm hnê ngăn tơnêi têa pơkâ thế mâu ngế cheăng tung Chin phuh tơpui leăng nhên tơdroăng tung kơpong ƀă a kong têa ê, mơhno tối mâu tơdroăng ki tơ’lêi hlâu, xơpá vâ ai troăng hơlâ pơkâ tơleăng tơtro; mơ’no tối mâu hnoăng cheăng, troăng hơlâ, mơdêk khât rôh ki tơ’lêi hlâu, pơkâ tơleăng xơpá dêi khu mơdró kâ, kuăn pơlê vâ mơdêk mơnhông.

Tiô tối tơbleăng, tơdroăng cheăng kâ rêh ối pơlê pơla tung khế 2 ƀă 2 khế apoăng hơnăm pơtối rak vế tơniăn, hên kơvâ mơnhông ƀă mâu tơdroăng ki bâ eăng. Tâi tâng kơxô̆ liăn châ xo ing tê tơmeăm ngi kong têa ê khế 2 tâk 6,1% tâng pơchông ƀă khế 1. Pêi chiâk deăng, pêt kong, păn ká xi xŏng tơniăn ƀă hlo tâk. Pêi kế tơmeăm xúa kơmăi kơmok hlo tơƀrê ‘mâi mơnhông.