Tiô hlá mơ-éa tối tơbleăng, tơdroăng cheăng kâ rêh ối pơlê pơla khế 7 pơtối châ mơnhông tơƀrê, châ hên mâu tơdroăng ki tro tâ khế 6, riân tơdjuôm 7 khế tơniăn lĕm tâ tâng vâ pơchông ƀă khế kố hơnăm nah tung tâi tâng mâu kơvâ cheăng. Ki xiâm cho hnoăng cheăng hnê mơhno pơkuâ ki xiâm hlo rơkê tâ, hbrâ rơnáu, rơkê, tơtro, ‘ló ƀă tơdroăng ki ai khât tâ; Tơdroăng mơnhông châ mơdêk a tá 3 kơpong cheăng ƀă kơmăi kơmok, pêi chiâk deăng, tê mơdró.

Mâu kơvâ cheăng ki kal dêi tơdroăng cheăng kâ pơtối hlo pơhlêh; hên tơdroăng ki tá hâi pêi pro tro klêi châ tơkŭm pơkâ tơleăng; tơdroăng tŏng kum rêh ối pơlê pơla châ rak vế tơniăn. Mơgêi rôh hôp, pôa Phạm Minh Chính - Ngế pro xiâm hnê ngăn tơnêi têa pơkâ thế rêm râ, mâu kơvâ cheăng, mâu kong pơlê kal pơtối pêi pro tơdâng tơ’mô, pêi kơtăng mâu hnoăng cheăng, troăng hơlâ pơkâ mơ’no tung mâu kơvâ cheăng ƀă hiâm mơno: Khŏm mơ-eăm khât, pêi tâi ivá tơná, pêi pro kơtăng, rak vế tơƀrê, mơ-eăm pêi pro ƀlêi chiâng tŭm têk mâu tơdroăng pơkâ pêi, hnoăng cheăng dêi hơnăm 2024; khŏm pêi pro kơtăng mơdêk rơdêi tâ nếo ‘no liăn pêi cheăng cheăng tơdjuôm, 3 tơdroăng pơkâ dêi tơnêi têa; Pơtối tơkŭm pơkâ tơleăng khât mâu tơdroăng ki tá hâi pêi pro klêi, pêi pro ton.