Xông tơpui a roh hôp, pôa Phạm Minh Chính - Ngế pro xiâm hnê ngăn tơnêi têa tối nhên, pơhlêh nếo khu pêi cheăng ƀă tơdroăng pêi cheăng dêi Chin phuh tiô troăng iâ mơngế, tơtro, pêi cheăng xuân châ tơƀrê, tơdroăng pêi cheăng xêt khât, châ tơƀrê; tơkŭm po khu xiâm hên kơvâ cheăng; kơdroh kơxô̆ mâu khu xiâm, kơ koan râ xiâm; mơdêk tơdroăng xing xoăng râ, xing xoăng hnoăng tơtro pơla Khu xiâm tơnêi têa ƀă kong pơlê... rế cho pơkâ pêi troh, rế cho hnoăng cheăng, troăng pêi ki kal vâ mơjiâng tơdroăng pơkuâ tơnêi têa kum ăm kuăn pơlê, tiô luât, rơkê păng ‘nâng, tiô rơxông nếo.

Ngế pro xiâm hnê ngăn tơnêi têa pơkâ thế mâu ngế pêi cheăng Khu hnê mơhno tơpui tơno mơnhên pơkâ xiâm mơjiâng Tơdroăng tơkêa bro mơgêi, tiô á tơdroăng tơkêa bro thế châ 02 pơkâ pêi plah: Hriăn plĕng, mơnhên tơtro, tâi tâng ‘na kơvâ cheăng, hnoăng cheăng, hnoăng chiâng pêi ƀă tơdroăng rah xo mơngế pêi cheăng dêi 04 hneăng Chin phuh (ing hneăng má XII troh hneăng má XV); Pơkâ troăng tơmiât pêi, pơkâ pêi plah, mơnhên troăng prôk la ngiâ hnoăng cheăng, troăng pêi ‘na kêi đeăng tơdroăng cheăng, hnoăng cheăng, hnoăng chiâng pêi ƀă tơdroăng pêi cheăng dêi Hneăng cheăng Chin phuh hneăng má XVI ƀă hneăng cheăng pơtối.